Mehi sira be naksulan iha Gaiola
Iha sira-nia oin murak
Ha’u fihir sira-nia hamnasa midar
Simu loron-foun ho esperansa
maski sira-nia matan konta hela sira-nia malahuk.
Sira mak feto foinsa’e hirak
Be remata ona eskola sekundaria iha munisipiu ne’e.
Ha’u hakbesik ba sira no sira konta sira-nia mehi:
Iha ida hanoin hela atu kontinua ba universidade
Inan-aman dehan osan mak laiha.
Iha ida, inan-aman osan iha
maibe sira fo de’it ba nia naan mak tenke ba uluk eskola
sira dehan, ‘nia feto, hela iha uma deit mos di’ak
Ba eskola aas oinsa mos sei mai fali dapur de’it’.
Iha ida hakarak atu tuir kursu Ingles no komputador
Nune’e remata karik bele hetan serbisu lalais
Hodi manan osan hare’e inan-aman, hare’e alin sira
Sosa fos no mina tau netik iha uma hodi tahan ba fulan ida.
Iha ida hakarak atu rejistu eskola iha universidade iha Dili
Foti medisina ka siensia biolojia no mehi atu tuir teste bolsu estudu ba railiur
maibe familia iha Dili laiha atu nia bele hela ho
Entaun familia haruka rejistu de’it ba universidade lokal iha munisipiu ne’e
No hateten nia ‘lalika ona ba dook’. Nune’e nia pasiensia, tenki hili fakuldade ne’ebe nia lakohi atu hili.
Iha ida, la kontinua eskola. Nia dehan nia halimar iha uma de’it
ho serbisu uma laran, ho familia no vizinu sira, ho atividade igreja
ho atividade iha aldeia laran, halimar hodi hein naroman ka halo rasik roman.
Iha ida dehan, nia hakarak atu buka dalan bele ba eskola
Nia lakohi hela uma de’it. Nia hakarak sai husi nia uma esplora mundu no fila mai nia knua
hodi lori buat diak haburas nia knua.
Sei iha tan ida no ida sira seluk ho ida-idak nia mehi be sei la to’o atu ha’u hato’o iha ne’e
Hirak ne’e mak mehi sira husi feto foinsa’e sira
ne’ebe ha’u hare’e naksulan hela iha gaiola
maibe nudar manuliin hakfuik hela de’it hakarak atu semo sai.
#poema #istoria #fetorural #foinsae #timor-leste
Manufahi, Setembru 2017
